Nous venions l’autrier de joer
    et de resver,
moi et mi conpaing et mi per,
car jolif cuer nos maine.
    L’amour n’est pas vilaine
    qui ensi nos demaine.
 
De Paris encontrasmes, ce cuit,
    le greigneur bruit
des dames qui vont en deduit
au pardon outre Saine.
    L’amour n’est pas vilaine
    qui ensi nos demaine.
 
La plus bele du mont i choisi,
    dame a mari,
par pou que son non ne vous di :
touz jorz me met en paine.
    L’amour n’est pas vilaine
    qui ensi nos demaine.
 
Ele ot euz vers, un chief si blondet,
    vis vermeillet,
douche bouche, douz mentonet,
une doucete alaine.
    L’amour n’est pas vilaine
    qui ensi nos demaine.
 
Tuit li deduit du mont sont en li,
    onc ce ne vi,
car elle chante sanz merci,
cler conme une seraine.
    L’amour n’est pas vilaine
    qui ensi nos demaine.
 
Je ne chant pas pour ce qu’ele maint
    ne ne bé point
car plus vaillant trouveroit maint.
Plus est blanche que laine.
    L’amour n’est pas vilaine
    qui ensi nos demaine.